१० माघ २०७९, दैलेख
दुल्लु नगरपालिका-९ पादुका क्षेत्रमा बँदेलले किसानहरुलाई हैरान पार्यो । संधैजसो जंगली बँदेलले उनीहरुले लगाएको अन्नबाली र सागपात नष्ट गर्न थाल्यो । बंदेलले दुःख दिन थाले पछि उनीहरुले डिभिजन वन कार्यालय दैलेखलाई खबर पनि गरे । तर समस्या समाधान भएन । त्यसपछि दुःखी बनेका किसानहरुले एउटा जुक्ति लगाए । संधैभरी नोक्सानी बेर्होनुपरेपछि उनीहरुले बँदेललाई पासो थाप्ने निधो गरे ।
शनिबार राती उनीहरुले पासो थापे । बंदेल पर्योहोला भनेर आइतबार विहानै हेर्न जाँदा त उनी तिन छक परे । कारण थियो उनीहरुले थापेको पासोमा बँदेल नभएर चितुवा परेको रहेछ । कहिल्यै चितुवा नदेखेका स्थानीयहरु चितुवा हेर्न तछाड मछाड गर्दै आइपुगे । दिनभर जात्रा नै भयो । चितुवालाइ हेर्ने मान्छेहरुको भिँडभाँड थियो । अन्तत बँदेलका लागी थापेको पासोमा चितुवा परेपछि उनीहरुले डिभिजन वन कार्यालय दैलेखमा खबर गरे ।
त्यसपछि बर्दिया राष्ट्रिय निकुञ्जका पशुचिकित्सक डा. चित्र खड्काको टोली घटनास्थलमा आयो । टोलीले पासोमा परेर घाइते भएको चितुवाको उद्धार गर्यो । तर ‘उद्दार गरिएको चितुवा बर्दिया राष्ट्रिय निकुञ्ज लैजान गाडीमा आउदै गर्दा बाटैमा मरेको छ ।
पशु अस्पतालमा चितुवाको पोष्टमार्टम गर्न लगाइयो,’ बर्दिया राष्ट्रिय निकुञ्जका पशुचिकित्सक डा. चित्र खड्काले भन्नुभयो । बँदेललाई थापेको पासोमा परेपछि चितुवा भाग्न खोज्दा डोरीले कसिएर पछाडिको भाग नचल्ने भएको र त्यही दुखाइले चितुवा मरेको पशु चिकित्सक डा. खड्काले बताउनुभयो ।
उपचार गर्न खोजिएको चितुवा बाटैमा मरेको कारण राष्ट्रिय आखेटोपहाड चितवनमा पठाउनका लागि मृत चितुवाको छाला काढेको र भित्री शरीर पशु अस्पताल दैलेखको हातामा गाडिएको डिभिजन वन कार्यालय दैलेखका निमित्त कार्यालय प्रमुख वेदप्रसाद ढकालले जानकारी दिनुभयो ।
