चार दलबीच यस्तो भयो ८ बुँदे सहमति (पूर्ण पाठ)

गज्जब नेपाल
२०८० फाल्गुन २१, सोमबार २१:०२

चार राजनीतिक दलबीच नयाँ सयुक्त सरकार गठन गर्ने ८ बुँदे सहमति भएको छ ।

१. राष्ट्रिय आवश्यकता र जनचाहनाअनुसार सरकारको कामलाई थप प्रभावकारी बनाउन तथा मुलुकको सुशासन, विकास, सामाजिक न्याय र समृद्धिका प्रश्नमा समान सोच राख्ने दलहरूका बीचमा सहकार्य आवश्यक रहेको महशुस गरी नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी र जनता समाजवादी पार्टी, नेपालको सहभागितामा नयाँ संयुक्त सरकार गठन गर्ने । सरकारको नेतृत्व नेकपा (माओवादी केन्द्र) का अध्यक्ष पुष्पकमल दाहाल “प्रचण्ड” ले गर्ने ।

२. रिक्त रहेको राष्ट्रिय सभाको अध्यक्षमा नेकपा (माओवादी केन्द्र) का उम्मेद्वार र उपाध्यक्षमा नेकपा (एमाले) का उम्मेद्वारलाई समर्थन गर्ने ।

३. सरकारमा सहभागी भएका दलहरूका बीचमा आपसी सहमतिमा मन्त्रालय बाँडफाँट गर्ने । त्यसरी बाँडफाँट गर्दा मन्त्रालयको विशेषताका आधारमा वर्गीकरण गरी मिलाउने । नयाँ संयुक्त सरकार गठन प्रक्रियामा सकारात्मक अन्य दलहरूसँग संवाद अघि बढाउने ।

४. सङ्क्रमणकालिन न्यायसम्बन्धी विधेयक, शान्ति प्रक्रिया र देशमा स्थायी शान्ति कायम गर्नका लागि यससँग सम्बन्धित अन्य विषयहरू सहमतिका आधारमा अविलम्ब टुङ्ग्याउने ।

५. सङ्घीयता कार्यान्वयनसँग सम्बन्धित बाँकी कानुन निर्माण गरी सबै तहका सरकारलाई प्रभावकारी बनाउने ।

६. सरकारको नीति तथा कार्यक्रमलाई मार्गदर्शन गर्ने गरी सरकारमा सहभागी दलहरूका बीचमा साझा न्यूनतम कार्यक्रम तयार गर्ने ।

७. यो सहमति कार्यान्वयनका लागि वर्तमान मन्त्रिपरिषद् पुनर्गठन गरी सहमतिअनुसार नयाँ संयुक्त सरकार गठन गर्ने ।

८. हामी चार राजनीतिक दल राष्ट्रिय स्वाधिनता, सार्वभौमसत्ता र भौगोलिक अखण्डतालाई सुदृढ गर्न तथा समाजवादउन्मुख आर्थिक-सामाजिक विकासका लागि राजनीतिक स्थायित्वको दिशामा अघि बढ्न सहमत भएका छौं ।

Next Post

वीरेन्द्रनगर ३ मा चारदिनदेखि सेवा प्रवाह ठप्प, राजनीतिक किचलाेले नागरिकलाई सास्ती

२०८० फाल्गुन २१, सोमबार २१:०२
सुर्खेत । वीरेन्द्रनगर नगरपालिकाको ३ नम्बर वडा कार्यालयमा राजनीतिक लडाइँले नागरिकहरुले खेप्नु सास्ती खेपिरहेका छन् । वडाध्यक्ष विनोदसिंह विष्ट र वडासदस्यको लडाइँले सेवा लिन वडा कार्यालय पुगेका सेवाग्राहीहरुले सास्ती खेपिरहेका हुन् । चार दिनदेखि वडाध्यक्ष विष्ट वडा कार्यालय बाहिर छन् । उनले वडा कार्यालयको कार्यबहाकको जिम्मेवारी वडा सदस्य शेरबहादुर थापालाई […]