दैलेखमा ट्राफिक नियमको उलङ्घन हुन नदिन प्रहरीले सक्रियता बढाएको छ । आज एकै दिन ११० सवारी साधन जाँच गर्दा ४३ ओटा कारबाहीमा परेका छन् ।
कर्णाली राजमार्ग र दैलेख-सुर्खेत सडक खण्डको विभिन्न स्थानमा सवारी जाँच गर्दा करिब आधाजसो सवारी साधन नियम विपरीत भेटिएको जिल्ला प्रहरी कार्यालय दैलेखका प्रमुख (डिएसपी) भुवनेश्वर प्रसाद साहले जानकारी दिए ।
चाडबाडको समयमा हुन सक्ने सम्भावित सवारी दुर्घटना न्यूनिकरण गर्न तथा व्यवस्थित यातायात संचालन गर्ने उदेश्यले चेकजाँचलाई कडाई गरिएको शाहले बताए ।
आजै मात्र ट्राफिक नियमको उलङ्घन गर्ने ४३ सवारी साधनलाई कारवाही गरी रु ३३ हजार राजस्व संकलन गरिएको पनि उनले जानकारी दिए ।
साथै उनले सवारी चालकहरुलाई ओभरलोड नगर्न, यात्रुहरुलाई अनावश्यक हैरानी नदिन, तोकिएको भाडादर भन्दा वढी भाडा नलिन निर्देशन दिएको जानकारी दिए ।
पछिल्लो समय जिल्लामा सवारी साधनमा क्षमता भन्दा बढी यात्रु राखेर सञ्चालन हुने गरेको पाइएको छ।