‘जनतासंग माओवादी विशेष रुपान्तरण अभियान’ को तयारी दैलेखमा पनि पुरा भएको छ । भोलीबाट सुरु हुन लागेको अभियानकाे सम्पूर्ण तयारी पुरा भएकाे नेकपा माओवादी केन्द्र दैलेखका इन्चार्ज गाेपाल शर्माले बताएका छन् ।
जिल्लाका ११ स्थानीय तहका ९० वटै वडामा एकैसाथ सुरू हुनेगरि तयारी भएकाे उनले बताए । केहिदिन अघि जिल्लामा सम्पन्न भएकाे बैठकले नेताहरुको कार्यविभाजन, अभियान संचालनको खाका लगायतका सबै काम टुंगाएकाे थियाे ।
भाेली नेकपा माओवादी केन्द्रका अध्यक्ष पुष्पकमल दाहाल प्रचण्डले देशभर एकैसाथ यो अभियानको उद्घाटन गर्दैछन् । साेही अभियान संचालन गर्न तम्तयार भएर बसेको नेकपा माओवादी केन्द्र दैलेखका संयोजक गाेपाल रिजालले बताए । उनका अनुसार जिल्ला इन्चार्ज, पालिका इन्चार्ज, वडा इन्चार्ज देखि टोलसम्मको जिम्मेवारी लिएर नेताहरु कार्यक्षेत्रमा खटिसकेका छन् ।
माओवादीले सबै केन्द्रीय सदस्यहरुलाई जिल्ला देखि अन्य तहको इन्चार्जको जिम्मेवारी तोकेर खटाएको छ । त्यस्तै अन्य सबै नेताहरुलाई पनि विभिन्न जिम्मेवारी तोकेर गाउँ पठाइएको माओवादी केन्द्रको भनाई छ ।
सबै नेताहरुलाई आफु कार्यरत रहेको भन्दा फरक क्षेत्रमा खटाइएको छ । यो अभियानमा संगठन विस्तार, सदस्यता वितरण तथा नविकरण, छलफल, बैठक, जनभेटघाट लगायतका गतिविधि संचालन हुने नेकपा माओवादी केन्द्रले जनाएको छ ।
अभियानबाट करिब २५ लाख मतदातासंग प्रत्यक्ष संवाद गर्ने र ८ लाख सदस्य बनाउने मुख्य उद्देश्य राखिएको छ । भोलीबाट सुरु हुने अभियान तीन महिनासम्म संचालन हुनेछ ।
