१५ कात्तिक २०७७, दैलेख
जिल्लाकाे नारायण नगरपालिका–७ किमुगाउँका १६ वर्षिय बालक गोबिन्द वि.क. बडादशैंको अघिल्लो दिन आमालाइ एउटा मर्मस्पर्शी चिठी लेखेर वेपत्ता भएका छन ।
उनको त्यो चिठी पढीसकेपछि आमा रातदिन छोराको यादमा रोइरहेकी छन । एकाविहानै घरबाट भागेर सुर्खेत पुगेका गोविन्द अहिलेसम्म पनि घर नफर्किएपछि आमाको रातदिन रुनुको विकल्प छैन ।
दशैंको खर्च जुटाउन गोेबिन्द र उनका दाइ बखत दैलेख बजारमा ज्यालामजदुरी गरिरहेका थिए । मजदुरी गरेको पैसा पाउनासाथ उनका दाइले अष्टमीको दिन ल्याएको मासुको पैंसा तिर्न गोबिन्दलाई तीन हजार रुपैया दिए । तर त्यो रकम गोविन्दले बाटैमा दौतरीको लहलहैमा लागेर तास खेलमा एकैछिनमा हारे ।
दशैंको लागि ल्याएको मासुको पैसा एकैछिनमा उडेपछि गोविन्दको होस पनि उड्यो । उनी घरमा गएर कसरी मुख देखाउने भन्ने चिन्तामा परे । कठीन मिहिनेत गरेर भोकभोकै कमाएको पैसा एकैछिनको रहरले उडाएपछि उनी एकाएक घर छोड्न निर्णयमा पुगे । बडादशैंको अघिल्लो दिन एकाविहानै घरबाट भागेर सुर्खेत पुगेका गोविन्द अहिलेसम्म पनि वेपत्ता छन् ।
१० गते सुर्खेतमा थिए भन्ने थाहा पाएर लगातार ४ दिनसम्म खोजी गर्दा पनि उनलाइ भेटाउन नसकेपछि घरपरिवार निकै चिन्तित छ । ‘नजानेर गल्ती भयो आमा मलाइ माफ गर्नुहोला, म सधैंको लागि गएको होइन, फर्किन्छु’ भनेर लेखेको चिठ्ठी हेरेर उनकी ६२ वर्षीया आमा रातदिन रोइरहेकी छिन् । जिल्ला प्रहरी कार्यालय सुर्खेत र दैलेखले बालकको हुलिया सहित खोजी गरिरहेको छ तर अहिलेसम्म पनि पत्ता सकेको छैन ।
