कर्णालीमा सामाजिक अपराधका घटना उच्च रहेको कर्णाली प्रदेशका प्रहरी नायब महानिरीक्षक (डीआईजी) बसन्तकुमार पन्तले बताएका छन् । उनले कर्णालीमा महिला हिंसाका घटना पनि सबैभन्दा उच्च देखिएको बताए । कर्णाली राजमार्गमा पर्ने गुराँस गाउँपालिका –१ स्थित तल्लो डुङ्गेश्वर प्रहरी चौकीकाे नवनिर्मित भवन उद्घाटनकाे क्रममा डिआईजी पन्तले यस्तो बताएका हुन् । शिक्षाको कमी, आर्थिक अवस्था कमजोर, मादक पर्दाथ सेवन, कोभिड १९ र बालविवाहले महिला हिंसा बढेको प्रहरीकाे बुझाइ छ ।
अब यस सामाजिक अपराधलाई न्यूनिकरणका लागि प्रदेशका १० जिल्लामा विभिन्न अभियान सञ्चालन गरिने डिआईजी पन्तले जानकारी दिए । अभियान सञ्चालनपछि सामाजिक अपराधका घटना न्यूनिकरण भएर समाजमा शान्ती सुरक्षा र दिगो विकास हुनेछ । सामाजिक अपराध मध्ये महिला हिंसाका घटना सुदुरपश्चिम प्रदेश जस्तै कर्णालीमा अवस्था दयनिय छ, उनले थपे ।
पछिल्लो समय कोभिड–१९ का कारणले आर्थिक अवस्था नाजुक भएकै कारणले आत्महत्याका घटना बढेका हुन् । यो प्रदेशमा भौगोलिक विकटताले गर्दा समयमै प्रहरी पुग्न कठिन छ । कुनै ठाउँमा दुईदिन पैदल यात्रा गरेर मात्र पुग्न अवस्था भएको प्रहरीका लागि चुनौतिको विषय बनेको छ । अपराधका घटना अन्त्य गर्न हरेक व्यक्ति शिक्षित हुनुपर्छ यद्धपी हालको अवस्थामा प्रहरीले जनचेतनामुलक कार्यक्रमहरु, घरदैलोमा पुगेर समस्याहरु पहिचान गरेर समस्या समाधान गर्ने तथा नागरिकहरुलाई सुसुचित गर्ने कार्यक्रम सञ्चालन गरिरहेको छ ।
प्रहरी चाैकी तल्लाे डुङ्गेश्वरकाे नवनिर्मित भवन तस्विरः प्रेमिका सिंह
सामाजिक अपराधका घटनाहरु न्यूनिकरण गर्न कर्णालीका १० वटै जिल्लामा कार्यरत महिला र पुरुष प्रहरी अधिकृतहरुलाई तालिम दिएर गाउँ गाउँमा पठाउने तयारी गरेको डिआईजी पन्तले जानकारी दिए । तालिम प्राप्त प्रहरी अधिकृतहरुले महिला हिंसा बढि भएका क्षेत्रहरुमा केन्द्रित गरेर कार्यक्रम सञ्चालन गर्नेछन् ।
प्रहरी नायव महानिरीक्षक पन्तले कर्णाली प्रदेशमा झण्डै एक हजार दुई सय भन्दा बढि प्रहरी जनशक्ति अभाव रहेको बताए । जनशक्ति थप गर्न संघीय सरकारसँग माग गरिरहेको छौं । प्रहरी समायोजन सकिए लगत्तै कर्णालीले प्रहरी जनशक्ति अभावको समस्या झेल्नु पर्दैन । कर्णालीका विभिन्न जिल्लामा प्रहरी कार्यालयहरुको स्तरोन्नती भईरहेको बताए । हालै डिएफआईडीको सहयोगमा कर्णालीमा चार वटा प्रहरी कार्यालयको भवन निर्माण सकिएको जानकारी दिए । जाजरकोटको सिमा र रिम्मा दैलेखको तल्लोडुगेश्वर र चुप्रामा भवन सम्पन्न भईसकेको डिआईजी पन्तले बताए ।
‘सुविधा सम्पन्न भवन निर्माण भएका छन् । प्रदेश सरकार र संघीय सरकारसँग समन्वय गरेर बाँकी रहेका प्रहरी कार्यालयका भवनहरु निर्माण गरिनेछ । ’प्रहरी नायव महानिरीक्षक पन्तले कर्णालीका जाजरकोट, हुम्ला, रुकुम लगाएतका जिल्लाहरुमा विप्लव माओवादीको छिटफुट गतिविधिहरु भईरहेको पनि जानकारी दिए । ‘विभिन्न जिल्लाहरुमा कार्यक्रम गर्ने, चन्दा असुली र पर्चा पम्पेलेट बाड्ने जस्ता गतिविधि नियन्त्रण तीनवटा सुरक्षा परिचालन गरिएको छ, प्रहरी नायव महानिरीक्षक पन्तले भने ।
