काठ्माडाैं । नेपाल सरकारले सामाजिक सञ्जाल टिकटक बन्द गर्ने भएकाे छ । आज बसेको मन्त्रिपरिषद बैठकले टिकटक बन्द गर्ने निर्णय गरेसंगै यसकाे पक्ष र विपक्षमा जनमत विभाजित भएकाे छ ।
टिकटकबाट सामाजिक सद्भाव बिगार्ने काम भएकाेले बन्द गर्ने निर्णय गरिएको सरकारकाे भनाइ छ । यता टिकटकका समर्थकहरूले भने सरकारले नागरिककाे स्वतन्त्रता हनन गर्न खाेजेकाे आराेप लगाएका छन् । देशकाे राष्ट्रिय सुरक्षाको कारण देखाउँदै धेरै देशमा टिकटकलाई निरन्तर प्रतिबन्ध गर्ने क्रम विश्वभर नै चलेकाे छ ।
भारतले जुन २०२० मा नै टिकटकलाइ प्रतिबन्ध लगाइसकेकाे छ । यसपछि विश्वका धेरै देशले यो एपमाथि प्रतिबन्ध लगाउँदै आएका छन् । भर्खरै डेनमार्कको रक्षा मन्त्रालयले पनि सरकारी कर्मचारीको फोनमा टिकटक प्रयोग गर्न प्रतिबन्ध लगाएको छ । योसँगै बेल्जियमले पनि टिकटकलाई सुरक्षा खतरा भन्दै सरकारी उपकरणमा यसको प्रयोगमा प्रतिबन्ध लगाएको छ ।
अहिले भारत, अफगानिस्तान, अस्ट्रेलिया, क्यानडा, बेल्जियम , डेनमार्क, युरोपियन युनियन, फ्रान्स, लात्भिया, नेदरल्यान्ड्स, न्युजिल्यान्ड, नर्वे, पाकिस्तान, ताइवान, बेलायत, अमेरिका, सोमालियालगायत अन्य धेरै देशहरूमा टिकटक प्रतिबन्धित छ।
